鬧爆你

昨晚，久未發火的我忍唔住又要忍住道氣鬧臭一個騙子。

事情係，有個死佬以出版為名四圍呃人
一次如是，兩次如是
三四五個人都經你出書而渣都無得淨

有人自己拎錢出書圓夢結果財貨兩失
又有人幫佢做翻譯或下插畫但俾佢走數

係咪唔好再用D 低能藉口話自己倒貼做得好慘呀？
會唔會全世界，
包括adidas呀~香港大學呀~全部都呃你所以你又要去呃人呀？
有無咁多苦衷食左之後唔敢同人講所以玩失蹤呀？

如果你開間舖拍烏蠅，係咪要客人代你找數呀？

你唔識做生意俾人呃，係咪全世界陪你搭沉船呀？

明知蝕錢你又一而再再而三做既？
無著數都中個頭落去，你係蠢定係有病呀？

會唔會係存心用間空殼公司呃人簽約又扮咩都唔知呀？

如果你唔係驚，你真心做好事又蝕錢，
你又要咁驚即刻話還錢？下？

本來欠我一二千蚊我可以忘記件事
但D粉腸呃完一個又一個，蝦人地文人唔會出聲唔反抗又怕煩，
所以一直可以消遙法外! 聽聞家陣都有水魚上釣中，
我又睇下你幾時爆煲!

香港地細到咁，網路世界又咁四通八達，
身邊又總有一個傳媒人可以幫手做大喇叭，
你都咁大膽蝦人蝦到咁盡，如果你個朵臭晒的話，你真係抵死!

尋日約條友出黎見面拆清楚，唔話報警都仲想改期唔出現，

如果唔係身有屎點解驚人報警先？

又，黎到又繼續兜圈，將D責任推落人地度。

夠膽話我知出書既公司無俾錢佢所以佢俾唔到錢我
嘩大佬，你叫我做架嘛，人地無俾你你都要俾我喎

仲同我講要倒貼？
我夠要倒貼搭車出黎聽你廢UP受你昆喇，你唔賠俾我？

結果本來諗住唔多講，點知一開口停唔到。

一兩千蚊唔係咩錢但係做人做到咁真係好有問題，
(而我係比其他人好彩好多!)
一而再再而三用呢樣野呃人真係好過份!

開頭條友其實想呃我多D添，
但我實在唔想同佢講野所以不了了之。

其實仆街兩隻字未講出口，我都算厚道。

而一個幾廿歲大男人俾幾個廿既歲既人鬧到一棟都無，
你真係反省下自己究竟做左柒事定係做左壞事
(或者兩者皆是?!?!)

我好耐無鬧人，尋日都未計算過要講咩已經開左口，
實在係一講起就扯真火!!

希望每個人都可以出返口氣同埋拎返D錢同埋書!!!

用出書黎呃人真係仆街到極點，人地用錢黎完成夢想，
你就用人地夢想黎呃返人。

賤格!! 你要發惡夢俾差人拉直到你還晒D錢!!

模特兒

有天回到公司，看到包裝精美得過份的派台碟。

對不起，我以為是森美移動又黎過。
第二句問：Share 定 Square?
第三條問題就是：咩呀，仲F4？

我想就算不是F4，還是以飛輪海和棒棒堂為參考對象吧？

四個模特兒，成為boyband以後，

最大得著該是可以做好多產品的代言人。
錢就是這樣子賺的---難道你以為真的靠唱歌?音樂? 賣碟?????

好坦白，我以前是Brian的fan屎。
即是，買雜誌時好喜歡看他做硬照model。

而現在他的定位，該是Vanesse???
(中間界長毛，唔係Vanesse唔通江口洋介咩，而家d人仲識唔識?)

看見Brian結果成了boyband隊員，我有二百個失望。

我當然知道model不能做一世，適當時候要breakthrough，
而香港又不是外國，沒有第二個Tyra Banks走去搞America's Next Top Model，
也不會有第二個Heidi Klum做香港版Project Runway。
所以，模界的突破就是拍電視劇，拍戲，或是做歌手。

但這種冒險的breakthrough，有點像盲中中爆格，
好運的會爆入一個富婆屋企仲撞正食Q出去煲緊煙，金銀珠寶任君嚐。
要是不好運，爆格爆著露宿者之家又如何呢？

聽著那隻歌，好多人工化的調音下，我聽不出誰唱了哪一段，
暫時未知四人開金口，有沒有當年Alive聽見吳彥祖唱歌那麼驚嚇。

我但願Brian不是另一個碧咸。
你知道有些人在某些範疇上很出色，跨界別就很容易死人；
例如張柏芝可以拍戲但不可唱歌，
欣宜可以唱歌但不可以行catwalk。
有多少硬照裡面非常出色特別的人，
一動 (拍電視廣告) 一開口就賴野呢？
心裡有數啊!

樂壇有了實力超班的方大同呀~王苑之呀~等等
又突然興返偶像派嗎?!?!

哎，我好怕。

希望效果不會太差。

但做boyband，真的好險好險。

-

從以前看Amoeba開始就特別留意model。
這幾年所謂model的水準真的嚇Q死人
你又係model？一街都係model!
所以遇到好特別的面孔我會端詳很久。
當然，在派對裡在百德新街在IT，
眼前活生生走動著，嘈呀~飲呀~hea呀~指住個鼻做貴賓呀~
讓人失望的為數不少

還是很希望，有美麗外表的，不要讓觀眾夢想幻滅。

但在香港，想找個靠個殼就能當個繆斯的，不容易吧。

一返工就想放假

精神不能放鬆的狀態維持了好一段時間。
見證著"假日的我"與"工作中的我"他認為，
他見到的完全是兩個人。

一坐在電腦面前右邊身就開始發麻，手腕也很痛。
當然脾氣就更壞。

唉。

婆仔數

早前受人所托幫手做少少正職工作以外的事
但又是公司本身的製作

手作仔所用之材料要重新買過，
架生雖然可以自備，
但齋買布都要預多點
免得死期到達時才撻Q就弊傢伙。
(題外話，如何定性呢單野呢? 公司野，但又唔屬於我工作範圍)



照計製作一舊道具，找外頭的公司的話一定要幾百蚊最低消費
找我幫手，人工當然是免費，就只有材料和交通費幾項支出。

算不上朝九晚五，放工時間都幾尷尬，
通常趕不及去銀行，平常行街買衫當然可以，
但偶然有些比較偏僻的勞作小店，
關門時間介乎七八點之間，
要不放工立即走，要不就要趕的士。




那只是三四十元的距離，要是沒辦法claim錢我寧願自掏腰包算了，
我是這麼想。
幾十蚊，慳左唔會發達，駛左唔會破產，
要是我趕不及買料，趕不及回家補補縫縫，
還要預時間，有NG和撻Q時可以補救；
我應承得你趕得起我便會做好，
錢買得到時間的話，這些的士錢其實唔駛慳。




於是老問題又出現。
當然，落手落腳做事的一批才沒有時間去斟酌
"點解你搭去目的地個程車貴左十蚊，乜你唔係用八達通買即日來回票咩？"
反而坐響樹無咩好做就會check人條數的
才會問點解呢度用左幾十蚊

於婆仔事情上面太豪邁的我
難道就是因為這樣子而沒有發達？
因為交錯單，原本30蚊的車費變了40蚊，
就引來連串問話，例如，由邊度去邊到要40蚊，
去完買野又去左邊？
當然，被問的又豈止我一個。
勞煩了無辜的同事我感到十分不好意思，
差額不過十蚊，如果再煩落去我一蚊都唔鬼要，還返40蚊俾你，我又有咩所謂？
搞到個個有心呃錢一樣被問到口啞啞，點解？

幫你做野明明你就慳左錢，
都仲要為少少錢令人難受，
真係那媽星!!

Timing問題

報紙說，一班演藝人會舉辦一個為期七年的賑災計劃。

這個意念不錯，將救援重點放於長期救援之上；
然而，我對於那些有關某某決定率領某某到災區做義工的計劃甚有保留。

首先，在救災方面，我從不奢望藝人在"提高社會關注"以外的事上，能夠實牙實齒的"救災"。災區無靚的酒店，無企理廁所，水都唔夠用，你們一眾藝人是否可以唔化妝唔set頭唔沖涼唔帶髮型師化妝師？一個人用一桶水的話，一拖三的耗水量已經以倍數計，此時此刻，我們需要命硬有善心又吃得苦的人多於artist。又，難道你們出發前不會call記者來張大合照？拎條大banner？去到災區會跟災民合照，發相給香港傳媒？跟當地救災組織進行簡單而隆重的善款移交儀式？

因為我不清楚香港那堆artist究竟在災區知名度有幾高，已經很累的災民還要面對這等三唔識七的artist，會否又是折磨？真正接受過訓練的義工還能在肉體或心靈上發揮照顧災民的作用，artist 是否懂得這些？還是握著人家的手問候幾句拍拍籮友又走得？我固然不懷疑artist們"想做d野"的善心，但這實在不是時候；你可以運用你的影響力叫fans們團結起來做點事，但大前題是，那些人真要聽你枝笛。普通市民如我，不會因為見到港姐無啦啦用手語唱歌表演，或是一眾新人甩咀唱medley而動了憐憫的心去捐錢的。連歌都唱不好，樂器又不太會彈，去到災區，我想問你做得d乜？搬物資？起屋？清理現場？照顧傷患？如果只是以引起公眾關注為目標，又實在不需要遠走四川，真心的，暫時讓這個地方好好接受治療，之後才去做點"讓你自己覺得安心一點"的善舉好嗎？如果你們在國內的知名度夠高，災民見到你們會很受鼓舞的話，你去現場打氣還有意思。如果我唔識你，但你黎探我我又要招呼你的話，我覺得我都幾無辜。

我心裡有張名單，有好些artist們，真正的藝術家音樂家，我真心知道他們的能力有多無遠拂屆。

但有太多的所謂artist，枉稱artist的，連mic咀唱歌都要唔岩咀形!! 你們還是繼續唱你的苦戀失戀三角戀暗戀孽戀情歌罷啦。

做善事梗係好架喇，出發點梗無錯架喎，但都要唔好好心做壞事囉!

認錯（人）

事情越來越似鬼故，有人說見到這個人在做甚麼甚麼，
又有人說是很多人都見到他在做甚麼甚麼；
喂，無喎，咪玩啦！會唔會太過份呀？

以訛傳訛，無中生有就係呢D勒！

H&M

或者我們太像一對可以幹點甚麼的人，
又可能太像設計師，
又常常讀潮流時裝和美學雜誌，
名字又這樣易記，
平時的行為形象又可能比較特出，
才有這樣一件事會發生。

我認為，我們該乾脆成立一間公司，創立一個品牌，
橫豎都有人這樣幻想；
然而，第一單疑似生意，完全不能夠省招牌，
而如果我真有做過，我的確希望神不知鬼不覺---
不是因為利益瓜葛，而是，不是A級功課恕我交不出來。

我開始懷疑，對事事都有批判的角度，
是理所當然的會招來"你轉工當了顧問"的效果。
只可惜，我會評論的，
不過是靚唔靚醜唔醜潮唔潮正唔正的無聊膚淺事。

真的，好鬼慶。

後來

後來也看了劉嘉玲訪問貧窮家庭的小朋友。那位小朋友，如陳志雲的V.O所說，心事重重，而且像是很介意自己的出身不好，說話有一句沒一句的。我會說，他的內心該很fragile，要小心處理。

談到零用錢的問題時，
嘉玲：你每個月有幾多錢零用錢？
小朋友：十蚊。
嘉玲：十蚊?????十蚊???你話，十蚊？
小朋友：....係。
嘉玲：(側晒頭) 咁你會點用呢十蚊？
小朋友：返學校買野食
嘉玲：十蚊，你買得d乜？
小朋友：買包糖。

之後的對話，是嘉玲繼續以高八度聲線問"你用三蚊買包糖，食一個月？咁下個月呢？下個月就唔用勒？"

我不知道小朋友心裡面想甚麼，我心裡面倒是覺得，想點先？不停用很驚奇的語氣去問問題，並不列入新聞性訪問技巧之中，我很懷疑，那個小朋友的自尊再一次受到打擊---或者他本來不覺得十蚊一個月有問題，但現在就發現，十蚊一個月零用錢，可能很像怪物。
最後，劉嘉玲的round up講到，他覺得這個小朋友很堅強，一定能夠面對逆境。我看完那堆剪得零碎的片段，我反而想知道，那個訪問完成以後，有沒有對小朋友的人生觀造成壞影響：因為我窮所以有明星訪問我，但佢覺得我十蚊用一個月仲要儲起七蚊實在太神奇，咁係咪有錢大晒先？咁我係咪有錢就得？咁我做乜都制，有錢就得。

一個娛樂台班底與一個新聞台班底一起做同類型的時事民生節目，分別是，娛樂台斟酌效果，訪問者，即是明星，才是主角。新聞台都講效果，但主角是受訪者，訪問者的角色縮得很小，有時甚至不存在，才不會有過份引導的效果。如果訪問中途，有人打瀉滾水，我深信巨星們會立即有助手髮型和化妝撲出來救駕，被訪者呢？應該還是自己顧自己。這是我幻想出來的情節，但我實在禁不住去想，究竟製作隊伍有幾懂得照顧被訪者的感受，特別是，他們正在挖掘別人最不想提及的困苦生活？而如果，整個製作花了很多時間去了解授受訪者，去建立信任的話，這些片段更應該展現於觀眾面前，或者是一個後記，總好過現在那些可有可無，形容詞多於一切的V.O。

那個V.O寫的稿繼續有問題，陳志雲話"李麗珊話過，養大一個小朋友要四百萬。"當下我呆住了，那幾時成為"李麗珊"的立場？記憶所及，那是一個廣告，有關處理資產的廣告，珊孱那句頂多叫對白。你可以於一個皆大歡喜的talk show裡面說笑道"珊孱都話，養個細路要四百萬啦!" 但這個是一個新聞性節目，事事講求真實，中肯，如果不能準確提到金句的出處，就不便亂用。李麗珊幾時需要為一句由廣告撰稿員的說話負上責任？很可能，下集的故事裡面，VO會寫：曾經有句名言，Happy makes time short。天呀，做新聞資料節目並不可以是但寫求其報導。我倒很想知道，我們究竟可以大學如何協助那些貧窮家庭小朋友。

這個一連幾天的節目，完了以後，下一步是甚麼？如果有心做goodwill的節目，應該做得更深入。否則，繼續買日本遊戲節目版權，笑笑算了。橫掂，有錢或無錢，開電視hehehaha又一天，娛樂大眾，也是一種公德。總好過好心做壞事。

凌晨三點三

早幾天還在吃木瓜奶海藻冰沙，綠豆沙，凍可樂等等。
以為還有時間吃點驅寒食物準備一下，那個浪卻已經殺到埋身。

吃了消炎止痛藥，混混愕愕的過了一天。凌晨三點，有東西在肚裡面鑽挖，痛醒了。

這種痛，不可能"分下心就無咁痛"，因為它會叫你睡不穩，試著轉身，只會更痛。眼光光，窗外的雀仔在唱歌，腦裡面很亂，痛著想入睡，又胡思亂想。等了好久我媽終於起來去廁所，運了好大的氣力叫住她，請她替我拿暖貼。錯手拿了兩塊鞋子專用的，也顧不了那麼多。一時間肚皮上面有塊竹醋藥貼，有個肚箍，也有兩塊鞋子專用暖貼。上半身很熱，下半身卻怕冷，極之矛盾。但我寧願熱到死也不要受涼。凌晨三點，禁不住sms同事說明一下身體狀況，幸好沒有吵醒她。

究竟何時才能撇抵這兩種叫我生活要按下pause的神經痛呢?

已經覺得好厭了。